धरान, माघ १६ ।
धरानस्थित बीपी कोइराला स्वास्थ्य विज्ञान प्रतिष्ठान (BPKIHS) मा आजदेखि राष्ट्रिय स्तरको मेडिकल कलेज फेस्ट ‘सिन्याप्स २०२६’ (SYNAPSE 2026) को औपचारिक उद्घाटन भएको छ। प्रतिष्ठानको स्टुडेन्ट्स वेलफेयर सोसाइटी (SWS) द्वारा आयोजित यो महोत्सव आगामी माघ २४ गतेसम्म सञ्चालन हुनेछ। 
आज आयोजित भव्य उद्घाटन समारोहमा प्रमुख अतिथि, प्रतिष्ठानका पदाधिकारी र वरिष्ठ चिकित्सकहरूको उपस्थिति रहेको थियो। पानसमा दीप प्रज्वलन गरी कार्यक्रमको उद्घाटन गर्दै अतिथिहरूले विद्यार्थीहरूको यो वृहत् जमघटलाई शुभकामना दिएका थिए।
उद्घाटन समारोहलाई सम्बोधन गर्दै प्रतिष्ठानका उपकुलपति (Vice Chancellor) डा. विक्रम श्रेष्ठले विद्यार्थीहरूको सिर्जनशीलताको प्रशंसा गर्नुभयो। उहाँले भन्नुभयो:
“चिकित्सा शिक्षा आफैमा एक कठिन र चुनौतीपूर्ण यात्रा हो। अस्पतालका वार्ड र गम्भीर अध्ययनका बीच यस्ता खेलकुद तथा सांस्कृतिक कार्यक्रमहरूले विद्यार्थीको मानसिक स्वास्थ्यलाई सन्तुलित राख्न मद्दत पुर्याउँछन्। सिन्याप्सले देशभरका भावी चिकित्सकहरूलाई एकै ठाउँमा जोड्ने काम गरेको छ।”
त्यसैगरी, कार्यक्रममा उपस्थित अन्य विशिष्ट अतिथिहरूले पनि बीपीकेआईएचएसले स्वास्थ्य सेवा मात्र नभई अतिरिक्त क्रियाकलापमा पनि नेतृत्वदायी भूमिका खेलेकोमा जोड दिनुभयो।
धरान उपमहानगरपालिकासँगको सम्बन्धबारे चर्चा गर्दै उहाँले भन्नुभयो, “अबका दिनमा बीपी प्रतिष्ठान र उपमहानगरपालिकाको समग्र प्रतिष्ठा र विकासका लागि दुवै संस्थाले हातेमालो गर्नु जरुरी छ। कार्यवाहक प्रमुख अइन्द्रविक्रम बेघाको आगमनसँगै साझेदारीका लागि ‘अच्छा दिन’ सुरु भएको छ। आउनुस्, सहकार्य गरौँ र धरान विकास गरौँ।”
आजैदेखि विभिन्न खेलकुद प्रतियोगिताहरू सुरु भएका छन्। यो उत्सवमा निम्न गतिविधिहरू हुनेछन्:
खेलकुद: क्रिकेट, फुटबल, र बास्केटबल जस्ता प्रतिस्पर्धात्मक खेलहरू।
सांस्कृतिक र साहित्यिक: नृत्य, संगीत र विविध साहित्यिक सत्रहरू।
सामाजिक कार्य: रक्तदान कार्यक्रम र सचेतनाका लागि वाक/रन (Walk/Run)।
समापन: चर्चित राष्ट्रिय कलाकारहरूको सांगीतिक प्रस्तुतिसहित समापन कन्सर्ट।
कार्यक्रम संयोजक प्रज्ज्वल खाँणका अनुसार देशभरका मेडिकल कलेजका विद्यार्थीहरूको सहभागिता रहेको यस कार्यक्रमको मूल नारा नै विद्यार्थीहरूबीच आपसी सद्भाव र सहकार्यको भावना विकास गर्नु रहेको आयोजकले जनाएको छ। धरानका लागि एक महत्त्वपूर्ण र उत्साहजनक इभेन्टका रूपमा हेरिएको सिन्याप्सले यहाँको स्थानीय आर्थिक र पर्यटकीय वातावरणमा समेत सकारात्मक ऊर्जा थपेको छ।
